جس میں ہر لحظہ حوادث کا گزر جانتے ہیں

جس میں ہر لحظہ حوادث کا گزر جانتے ہیں

ہم اسی راہ کو شایانِ سفر جانتے ہیں

رہروِ راہِ محبت کی نہ پوچھو منزل

وہ تو منزل کو بھی اک راہ گزر جانتے ہیں

پرتوِ روئے محمد سے ہے ہر شے کو فروغ

کس کا صدقہ ہیں یہ خورشید و قمر جانتے ہیں

تم ہی بن جاؤ مرے عہد گذشتہ کے گواہ

سب مجھے راہ کا بے فیض شجر جانتے ہیں

کس کی ہے کون سی منزل یہ ہمیں کیا معلوم

ہم تو آباد مدینے کا سفر جانتے ہیں

۔۔۔۔

چراغِ یادِ گذشتہ ابھی سلامت ہے

نہ تیرگیِ سحر ہے نہ شامِ ظلمت ہے

کہیں خیال، کہیں دل، کہیں نگاہیں ہیں

یہ کیا مقام ہے دل کی عجیب حالت ہے

ہمارے شام وسحر ہیں فراق و ہجر سے دور

وہ سامنے ہیں ہمہ وقت اب یہ صورت ہے

غم حیات مِرا احترام ہے لازم

مرے خیال میں وہ جانِ صد لطافت ہے

خیالِ دیر و حرم محترم سہی لیکن

کسی کی یاد میں رہنا بھی اک عبادت ہے

۔۔۔

کر کے روشن شامِ فرقت کو چراغِ غم سے ہم

کہہ رہے ہیں داستان ہجر چشمِ نم سے ہم

ہے بہارِ زندگانی اک فریبِ مستقل

ہیں گلستانِ جہاں میں مہاں شبنم سے ہم

دل کے آئینے میں ہے عکسِ دو عالم اے ندیم

اس لیے دل کو فزوں سمجھے ہیں جامِ جم سے ہم

ہر غم پنہاں علم بردارِ عشرت ہوگیا

آشنا جب ہو گیے لطفِ غم پیہم سے ہم

شعر کہنے کی لیاقت تو نہیں رکھتے مگر

ہیں غزل گو آج بھی استاد ہی کے دم سے ہم

مژدۂ صبحِ مسرت سن کے ہوتا ہے ملال

اس قدر مانوس ہیں آبادؔ شامِ غم سے ہم