پلا دے ساقیا وہ جامِ ارغواں مجھ کو

پلا دے ساقیا وہ جامِ ارغواں مجھ کو

نظر نہ آئے کہیں بھی میرا نشاں مجھ کو

نفس نفس پہ ہے اک بحرِ بے کراں مجھ کو

قدم قدم پہ ہے اک تازہ امتحاں مجھ کو

تیرے خیال میں منزل سے دور جا نکلا

تلاش کرتا ہے خود میرِ کارواں مجھ کو

جہاں گزرنا فرشتوں کا غیر ممکن ہے

تیری نگاہ نے پہنچا دیا وہاں مجھ کو

کسی کی مست نگاہوں کا یہ تصرف ہے

دکھائی دیتی ہے وہ حدِ لا مکاں مجھ کو

فریب حسنِ رخ یار نے ہے لوٹ لیا

بنا کے اپنی محبت کا راز داں مجھ کو

امیرؔ صابری کیوں جائے طوافِ کعبہ کو

حرم کدہ ہے کسی بت کا آستاں مجھ کو