نرالے کی نرالی ہر ادا ہے

نرالے کی نرالی ہر ادا ہے

جدھر دیکھو ادھر جلوہ نما ہے

اسے کہتے ہیں تصویرِ تصور

مجھے اب آپ پر دھوکا ہوا ہے

سمجھنے سے نہ سمجھانے سے آئے

محبت کا عجب کچھ ماجرا ہے

گھٹائیں جھومتی ہیں میکدے پر

بس اب پینے پلانے کا مزا ہے

جسے دنیا ہلالِ عید سمجھے

حقیقت میں وہ تیرا نقشِ پا ہے

امنڈ کر مستیاں طیبہ سے آئیں

کسی میخوار کی دیکھو دعا ہے

عجب بن ٹھن کے نکلے ہیں وہ گھر سے

دلِ ناداں تیرا حافظ خدا ہے

کسی کو ناز و زہد و اتقا پر

مجھے تیرے کرم کا آسرا ہے

امیرؔ صابری کا ان کے در پر

نمازِ عشق کا سجدہ روا ہے