راحت ہو یا کہ رنج ہو جو کچھ عطا کرے

راحت ہو یا کہ رنج ہو جو کچھ عطا کرے

بندہ ہر ایک حال میں شکرِ خدا کرے

وہ اپنے منھ سے رشکِ مسیحا ہوا کرے

عیسیٰ ہے گر تو درد کی میرے دوا کرے

مرتا ہے آپ سے بھی کسی پر کوئی بھلا

قابو میں اپنا دل ہی نہ ہو جب تو کیا کرے

کہتا ہوں جب کہ آپ پہ جاتی ہے میری جان

کہتے ہیں کس ادا سے کہ جائے خدا کرے

کیا بے نیازیاں ہیں بتوں کی خدا کی شان

ہم دل کریں نثار وہ ظالم جفا کرے

تیری ادا کے سامنے شرمندہ ہے قضا

چتون سے تیری فتنہ محشر حیا کرے

دل سا رفیق اپنا ہوا جب نہ غم گسار

دنیا میں کس سے کوئی امید وفا کرے

لب اپنے آشنا نہیں حرف سوال سے

ان کی یہ آرزو کہ کوئی التجا کرے

خالی نہ میہماں سے ہو مہماں سرائے دل

امید اگر نہیں ہے تو حسرت رہا کرے

دل ہم نے امجدؔ اس بت کافر کو دے دیا

اب چاہے وہ کرم کرے چاہے جفا کرے