ek barq-e-tajalli ne meri tamir ke TukDe kar Dale

ik barq-e-tajallī ne merī ta.amīr ke TukḌe kar Daale

tadbīr ke TukḌe kar Daale taqdīr ke TukḌe kar Daale

paayā na thā jab tak us but ko maiñ apnī parastish karatā thā

haath aaga.ī jab aslī sūrat tasvīr ke TukḌe kar Daale

bhūlā huā jab tak thā chup thā jab aaga.ī us ko yād-e-vatan

ik chashm-e-zadan meñ qaidī ne zanjīr ke TukḌe kar Daale

shah-rag ke qarīb vo rahtā thā kis tarah galā kaT saktā thā

nāzuk-sī rag-e-gardan ne merī shamshīr ke TukḌe kar Daale

afsāna-e-ġham kahne ke liye soche to bahut kuchh the 'amjad'

ik tez nazar ne zālim kī taqdīr ke TukḌe kar Daale

ek barq-e-tajalli ne meri tamir ke TukDe kar Dale

tadbir ke TukDe kar Dale taqdir ke TukDe kar Dale

paya na tha jab tak us but ko main apni parastish karata tha

hath aagai jab asli surat taswir ke TukDe kar Dale

bhula hua jab tak tha chup tha jab aagai us ko yaad-e-watan

ek chashm-e-zadan mein qaidi ne zanjir ke TukDe kar Dale

shah-rag ke qarib wo rahta tha kis tarah gala kaT sakta tha

nazuk-si rag-e-gardan ne meri shamshir ke TukDe kar Dale

afsana-e-gham kahne ke liye soche to bahut kuchh the 'amjad'

ek tez nazar ne zalim ki taqdir ke TukDe kar Dale