دنیا کی فضا بس ایک نظر میں زیر و زبر ہو جاتی ہے

دنیا کی فضا بس ایک نظر میں زیر و زبر ہو جاتی ہے

وہ دیکھتے ہیں ان نظروں سے نظروں کو نظر ہو جاتی ہے

وہ دنیا سے کھو جاتا ہے اور کیا سے کیا ہو جاتا ہے

اس مست نظر کی جس پر بھی اک بار نظر ہو جاتی ہے

جب آتی ہے رات وہ آتے ہیں ساتھ اپنے اجالا لاتے ہیں

چھا جاتا ہے اندھیرا آنکھوں میں جس وقت سحر ہو جاتی ہے

تدبیر کوئی چلتی ہی نہیں تقدیر کبھی ٹلتی ہی نہیں

ہر چند بدی سے بچتا ہوں اس پر بھی مگر ہو جاتی ہے

ہر وقت گزرتا رہتا ہے یہ دریا بہتا رہتا ہے

ہو عید کا دن یا شامِ الم ہر حال بسر ہو جاتی ہے

موجود جو شئے ہو جاتی ہے معدوم نہیں پھر ہو سکتی

دنیائے وجود میں اے امجدؔ تغییر صور ہو جاتی ہے

۔۔۔

جب مسندِ فقر پہ بیٹھ گیے شاہی کی تمنا کون کرے

جب مالکِ کونین اپنا ہو کونین کی پرواہ کون کرے

معبود اگر مشہود نہیں پھر طاعت میں کچھ سود نہیں

مسجود کی جب تک دید نہ ہو موہوم کو سجدہ کون کرے

ہر خواہش جان کی کاہش ہے خواہش جو نہ ہو آسایش ہے

سنتا نہیں جب اپنی کوئی پھر عرضِ تمنا کون کرے

تم آؤ نہ آؤ وعدے پر ہر حال میں راضی ہے امجدؔ

تم جان اور دل کے مالک ہو مالک سے تقاضا کون کرے