aur marne ka hamein kuchh gham nahin

aur marne kā hameñ kuchh ġham nahīñ

zulm kis par Dhā.egā jab ham nahīñ

vaqt par apnā asar dikhlā.egā

be-asar ye nāla-e-paiham nahīñ

so rahe haiñ chain se ahl-e-'adam

fitna-e-'ālam kā un ko ġham nahīñ

mar rahā huuñ ab mire ghar aa chuke

kis ko dam dete ho ab to dam nahīñ

ḳhanda-zan haiñ misl-e-gul taklīf meñ

zaḳhm-e-dil ko hājat-e-marham nahīñ

kis sahāre par ji.eñ bedam tire

jab tirī teġh-e-sitam meñ dam nahīñ

be-sabātī ro rahī hai dekh kar

barg-e-gul par qatra-e-shabnam nahīñ

kam nahīñ uljhan dil-e-ġhamnāk meñ

kab ḳhayāl kā kal braham nahīñ

koste haiñ vo du'ā kī aaḌ meñ

ye vo pahlū hai ki jis meñ zam nahīñ

'arsh' dillī se jo hai nisbat tujhe

tū kabhī ahl-e-zabāñ se kam nahīñ

aur marne ka hamein kuchh gham nahin

zulm kis par Dhaega jab hum nahin

waqt par apna asar dikhlaega

be-asar ye nala-e-paiham nahin

so rahe hain chain se ahl-e-'adam

fitna-e-'alam ka un ko gham nahin

mar raha hun ab mere ghar aa chuke

kis ko dam dete ho ab to dam nahin

KHanda-zan hain misl-e-gul taklif mein

zaKHm-e-dil ko hajat-e-marham nahin

kis sahaare par jien bedam tere

jab teri tegh-e-sitam mein dam nahin

be-sabaati ro rahi hai dekh kar

barg-e-gul par qatra-e-shabnam nahin

kam nahin uljhan dil-e-ghamnak mein

kab KHayal ka kal braham nahin

koste hain wo du'a ki aaD mein

ye wo pahlu hai ki jis mein zam nahin

'arsh' dilli se jo hai nisbat tujhe

tu kabhi ahl-e-zaban se kam nahin