جسے غم کے پَر بھاؤ کا غم نہیں

جسے غم کے پَر بھاؤ کا غم نہیں

جہاں میں کوئی ایسا رستم نہیں

جھلس جائے گا اس سے من کا کنول

کرودھ ایک شعلہ ہے شبنم نہیں

ہوس کے دو راہے پہ سنسار میں

ملن بھی جدائی ہے سنگم نہیں

پر کشن ہے پت جھڑ کے نرمان کا

یہ جیون بہاروں کا موسم نہیں

جو جیون کی راہوں پہ بھٹکائے من

اندھیرے سے وہ روشنی کم نہیں

ستم پر ستم گر سے سہما رہے

ستم سے یہ احساس بھی کم نہیں

خزاں میں تو سب کچھ تھے ارشدؔ مگر

بہاروں میں کچھ بھی کہیں ہم نہیں