aankhen be-kar hain jab dekhen na surat teri

āñkheñ be-kār haiñ jab dekheñ na sūrat terī

dil vo kyā dil hai na ho jis meñ mohabbat terī

jald ai ruuh safar paikar-e-ḳhākī se na kar

chand roza hī mulāqāt ġhanīmat terī

is liye hai par-e-tā.ūs kī qur.āñ meñ jagah

ki dikhātā hai ye nairañgī-e-qudrat terī

sho’la-e-nār-e-saqar se jo Dare ahl-e-gunāh

abr ban-ban ke barasne lagī rahmat terī

paañv kāñToñ kī sinānoñ pe haiñ dīvānoñ ke

raah kyā saḳht hai ai vādī-e-vahshat terī

sair-e-bāzār ko to roz nikaltā hai 'asīr'

aa ga.ī kyā kisī yūsuf pe tabī'at terī

aankhen be-kar hain jab dekhen na surat teri

dil wo kya dil hai na ho jis mein mohabbat teri

jald ai ruh safar paikar-e-KHaki se na kar

chand roza hi mulaqat ghanimat teri

is liye hai par-e-taus ki quran mein jagah

ki dikhata hai ye nairangi-e-qudrat teri

sho’la-e-nar-e-saqar se jo Dare ahl-e-gunah

abr ban-ban ke barasne lagi rahmat teri

panw kanTon ki sinanon pe hain diwanon ke

rah kya saKHt hai ai wadi-e-wahshat teri

sair-e-bazar ko to roz nikalta hai 'asir'

aa gai kya kisi yusuf pe tabi'at teri