taat mein dhyan hai kisi qad-e-daraaz ka

tā'at meñ dhyān hai kisī qad-e-darāz kā

ā'zam yahī hai rukn hamārī namāz kā

kushta huuñ bas ki yaar ke qad-e-darāz kā

saaya mire mazār pe hai sarv-e-nāz kā

masjid ko mai-kade se na zāhid bulā mujhe

tā’jīl kyā hai vaqt to aa.e namāz kā

furqat meñ yuuñ marūñ ki na ho maut ko ḳhabar

aisā ḳhayāl hai mujhe iḳhfā-e-rāz kā

yāroñ se kah do ghar ko chale jaa.eñ bā’d-e-dafn

ho taḳhliya ki vaqt hai rāz-o-niyāz kā

manzūr ho misāl to tuubā se duuñ misāl

mazmūñ buland chāhiye qad-e-darāz kā

mahshar meñ kis nishāñ se ilāhī hoñ dād-ḳhvāh

kushta huuñ tīr-e-ġhamza-o-shamshīr-e-nāz kā

shāh-o-gadā meñ mahfil-e-sher-o-suḳhan meñ ek

is mai-kade meñ daḳhl nahīñ imtiyāz kā

māl-o-matā'-e-dahr kī parvā nahīñ mujhe

huuñ be-niyāz shukr hai us be-niyāz kā

ta'at mein dhyan hai kisi qad-e-daraaz ka

aa'zam yahi hai rukn hamari namaz ka

kushta hun bas ki yar ke qad-e-daraaz ka

saya mere mazar pe hai sarw-e-naz ka

masjid ko mai-kade se na zahid bula mujhe

ta’jil kya hai waqt to aae namaz ka

furqat mein yun marun ki na ho maut ko KHabar

aisa KHayal hai mujhe iKHfa-e-raaz ka

yaron se kah do ghar ko chale jaen ba’d-e-dafn

ho taKHliya ki waqt hai raaz-o-niyaz ka

manzur ho misal to tuba se dun misal

mazmun buland chahiye qad-e-daraaz ka

mahshar mein kis nishan se ilahi hon dad-KHwah

kushta hun tir-e-ghamza-o-shamshir-e-naz ka

shah-o-gada mein mahfil-e-sher-o-suKHan mein ek

is mai-kade mein daKHl nahin imtiyaz ka

mal-o-mata'-e-dahr ki parwa nahin mujhe

hun be-niyaz shukr hai us be-niyaz ka