عاجز ہیں سب غرور کسی کا بجا نہیں

عاجز ہیں سب غرور کسی کا بجا نہیں

آفاق میں خدا کا کوئی دوسرا نہیں

عمر رواں، رواں ہے کوئی جانتا نہیں

یہ طرفہ کارواں ہے کہ جس میں درا نہیں

ذرے ہیں کس شمار میں خورشید کے حضور

اس کے سوا ہمیں طلبِ ماسوا نہیں

سمجھے جو اس میں مجھ میں جدائی ہے بے بصر

دریا سے موج موج سے دریا جدا نہیں

سجدہ خدا کو کیجیے کیا خلق کے حضور

مقبول وہ نماز ہے جس میں ریا نہیں

ظاہر میں فرق ہے صفت رنگ و بوئے گل

ہے اصل ایک کوئی کسی سے جدا نہیں

دولت وہی ہے جس کو کہ کہتے ہیں ترک حرص

دل ہے غنی تو حاجت سیم و طلا نہیں

شدت ہو دردِ دل کی تو گھبرا نہ اے اسیرؔ

مرتا ہے کب مرض سے وہ جس کی قضا نہیں