تھک چکے ہیں پاؤں اس کا آستانہ دور ہے

تھک چکے ہیں پاؤں اس کا آستانہ دور ہے

دن ہے کم، منزل کڑی ہے اور جانا دور ہے

وائے قسمت باغ میں صیاد آ پہنچا قریب

بال و پر اپنے نہیں اور آشیانہ دور ہے

گور میں گڑ کر کہیں گے بعدِ مردن یہ حریص

ہائے اب تک ہم سے قاروں کا خزانہ دور ہے

بھاگ دنیا سے کہ ہو تیرِ حوادث سے نجات

چوک جاتا ہے وہ اکثر جو نشانہ دور ہے

شکل سے نفرت ہے سب کو کوئی پاس آتا نہیں

ہم سے تم کیا دور ہو، سارا زمانہ دور ہے

بے ہنر مسند نشیں، اہلِ ہنر در در خراب

عقل انساں سے خدا کا کارخانہ دور ہے

دہر میں کب ہو ظہورِ مہدیِ ہادی اسیرؔ

دیکھیے نزدیک ہے یا وہ زمانہ دور ہے