آنکھیں بیکار ہیں جب دیکھیں نہ صورت تیری

آنکھیں بیکار ہیں جب دیکھیں نہ صورت تیری

دل وہ کیا دل ہے نہ ہو جس میں محبت تیری

نخلِ ہستی سے نمودار ہے حسرت تیری

اصل وحدت ہے تری فرع ہے کثرت تیری

جلد اے روح سفر پیکر خاکی سے نہ کر

چند روزہ ہے ملاقات غنیمت تیری

کوئی پہنچا نہ ترے جلوہ گہہ ناز میں یار

راہ ڈھونڈھا کیے ہفتاد و دو ملت تیری

کیا عذاب شب فرقت سے چھڑایا ہم کو

مہربانی تری اے مرگ عنایت تیری

غنچۂ دل کو مرے چاک نہ کر ڈرتا ہوں

کہ پریشان نہ ہو بوئے محبت تیری

اس لیے ہے پر طاوس کی قرآں میں جگہ

کہ دکھاتا ہے یہ نیرنگی قدرت تیری

باغ میں بلبل و گل بزم میں پروانہ و شمع

بھیس بدلے ہوئے پھرتی ہے محبت تیری

شعلہ نار سقر سے جو ڈرے اہل نگاہ

ابر بن بن کے برسنے لگی رحمت تیری

سرکشی صورت آتش نہ کر اے پارہ خاک

ذرے ذرے کو ہے معلوم حقیقت تیری

بدلے نرگس کے اگیں گور پر آنکھیں ہر سال

راہ دیکھا کیے ہم تا بقیامت تیری

پاؤں کانٹوں کے سنانوں پہ ہیں دیوانوں کے

راہ کیا سخت ہے اے وادی وحشت تیری

دفن زر کے لیے کھدوائی ہے تو نے جو زمیں

دیکھ منعم کہ اسی جانہ ہو تربت تیری

ہوچکا محکمہ در نارو جناں کے ہوئے بند

دیکھتے رہ گئے ہم حشر میں صورت تیری

سیر بازار کو تو روز نکلتا ہے اسیرؔ

آ گئی کیا کسی یوسف پہ طبیعت تیری