bu-e-KHush deta hai mahfil mein pasina yar ka

bū-e-ḳhush detā hai mahfil meñ pasīnā yaar kā

'itr khīñchā kHuub garmī ne gul-e-ruḳhsār kā

ġhair kyuuñ karatā hai vasf is abrū-e-ḳhamdār kā

bāñdhnā nā-mard ko zebā nahīñ talvār kā

barg-e-nakHl-e-tūr hilte haiñ to aatī hai sadā

aañkh kar paidā agar ho hausla dīdār kā

mard-e-'ālī-qadr se duniyā karegī kyā ḳhalish

pā-e-rākib ko nahīñ raste meñ khaTkā ḳhaar kā

aañkh kā halqa bajā-e-tauq gardan chāhiye

huuñ maiñ dīvāna kisī kī nargis-e-bīmār kā

sahn-e-mahshar se hameñ karte haiñ bāhar kyuuñ malak

ham bhī aa.e haiñ tamāshā dekhne bāzār kā

haiñ tamāshā.ī jo gulzār-e-mohabbat ke 'asīr'

phal sar-e-mansūr ko kahte haiñ naḳhl-e-dār kā

bu-e-KHush deta hai mahfil mein pasina yar ka

'itr khincha kHub garmi ne gul-e-ruKHsar ka

ghair kyun karata hai wasf is abru-e-KHamdar ka

bandhna na-mard ko zeba nahin talwar ka

barg-e-nakHl-e-tur hilte hain to aati hai sada

aankh kar paida agar ho hausla didar ka

mard-e-'ali-qadr se duniya karegi kya KHalish

pa-e-rakib ko nahin raste mein khaTka KHar ka

aankh ka halqa baja-e-tauq gardan chahiye

hun main diwana kisi ki nargis-e-bimar ka

sahn-e-mahshar se hamein karte hain bahar kyun malak

hum bhi aae hain tamasha dekhne bazar ka

hain tamashai jo gulzar-e-mohabbat ke 'asir'

phal sar-e-mansur ko kahte hain naKHl-e-dar ka