بوئے خوش دیتا ہے محفل میں پسینا یار کا

بوئے خوش دیتا ہے محفل میں پسینا یار کا

عطر کھینچا خوب گرمی نے گل رخسار کا

غیر کیوں کرتا ہے وصف اس ابروئے خم دار کا

باندھنا نا مرد کو زیبا نہیں تلوار کا

برگ نخل طور ہلتے ہیں تو آتی ہے صدا

آنکھ کر پیدا اگر ہو حوصلہ دیدار کا

مرد عالی قدر سے دنیا کرے گی کیا خلش

پائے راکب کو نہیں رستے میں کھٹکا خار کا

آنکھ کا حلقہ بجائے طوق گردن چاہیے

ہوں میں دیوانہ کسی کی نرگس بیمار کا

صحن محشر سے ہمیں کرتے ہیں باہر کیوں ملک

ہم بھی آئے ہیں تماشا دیکھنے بازار کا

ہیں تماشائی جو گلزار محبت کے اسیرؔ

پھل سر منصور کو کہتے ہیں نخل دار کا