matlab-e-dil be-talab ho jaega

matlab-e-dil be-talab ho jā.egā

jab ḳhudā chāhegā sab ho jā.egā

sabr kar ai dil sitam us ke uThā

uff agar nikle ġhazab ho jā.egā

mil rahegā rizq-e-taqdīrī hameñ

kuchh bahāna kuchh sabab ho jā.egā

tum pukāroge mujhe jis naam se

bas vahī merā laqab ho jā.egā

be-adab kahiye na mujh ko bār-bār

mujh se bhī tark-e-adab ho jā.egā

jā.eñge ham rind yuuñ firdaus meñ

ahl-e-taqvā ko 'ajab ho jā.egā

tum chhupāoge agar zulfoñ meñ ruḳh

dil siyah mānind-e-shab ho jā.egā

paḌ ga.ī jis din nigāh-e-ahl-e-fahm

saarā dīvān muntaḳhab ho jā.egā

ḳhud bulā.eñge vo mujh ko baam par

tuur par muusā talab ho jā.egā

naza.a ke dam murtazā aa.e 'asīr'

ḳhātima-bil-ḳhair ab ho jā.egā

matlab-e-dil be-talab ho jaega

jab KHuda chahega sab ho jaega

sabr kar ai dil sitam us ke uTha

uff agar nikle ghazab ho jaega

mil rahega rizq-e-taqdiri hamein

kuchh bahana kuchh sabab ho jaega

tum pukaroge mujhe jis nam se

bas wahi mera laqab ho jaega

be-adab kahiye na mujh ko bar-bar

mujh se bhi tark-e-adab ho jaega

jaenge hum rind yun firdaus mein

ahl-e-taqwa ko 'ajab ho jaega

tum chhupaoge agar zulfon mein ruKH

dil siyah manind-e-shab ho jaega

paD gai jis din nigah-e-ahl-e-fahm

sara diwan muntaKHab ho jaega

KHud bulaenge wo mujh ko baam par

tur par musa talab ho jaega

naza ke dam murtaza aae 'asir'

KHatima-bil-KHair ab ho jaega