مطلب دل بے طلب ہو جائے گا

مطلب دل بے طلب ہو جائے گا

جب خدا چاہے گا سب ہو جائے گا

صبر کر اے دل ستم اس کے اٹھا

اف اگر نکلے غضب ہو جائے گا

مل رہے گا رزق تقدیری ہمیں

کچھ بہانہ کچھ سبب ہو جائے گا

تم پکارو گے مجھے جس نام سے

بس وہی میرا لقب ہو جائے گا

بے ادب کہیے نہ مجھ کو بار بار

مجھ سے بھی ترک ادب ہو جائے گا

جائیں گے ہم رند یوں فردوس میں

اہل تقوی کو عجب ہو جائے گا

تم چھپاؤ گے اگر زلفوں میں رخ

دل سیہ مانند شب ہو جائے گا

پڑ گئی جس دن نگاہ اہل فہم

سارا دیوان منتخب ہو جائے گا

خود بلائیں گے وہ مجھ کو بام پر

طور پر موسیٰ طلب ہو جائے گا

نزع کے دم مرتضیٰ آئے اسیرؔ

خاتمہ بالخیر اب ہو جائے گا