daulat-e-duniya ki kya parwa mujhe

daulat-e-duniyā kī kyā parvā mujhe

haq ne baḳhshā ganj-e-istiġhnā mujhe

tum karo mujh par jafā.eñ maiñ vafā

vo tumheñ zebā hai ye zebā mujhe

bak rahā hai tū maiñ baiThā huuñ ḳhamosh

tujh ko ai nāseh hai yā saudā mujhe

takHt-o-tāj-o-māl-o-daulat kyā karūñ

yā ilāhī sabr de thoḌā mujhe

kab shab-e-ġham meñ hai ummīd-e-sahar

kyā ho ai nāseh ġham-e-fardā mujhe

aqrabā haiñ saath turbat meñ na dost

chal diye sab chhoḌ kar tanhā mujhe

māh-ruḳhsāroñ kā 'āshiq jaan kar

daaġh detā hai falak kyā kyā mujhe

gar paḌā chāh-e-zanaḳhdāñ meñ 'asīr'

shauq ne aisā kiyā andhā mujhe

daulat-e-duniya ki kya parwa mujhe

haq ne baKHsha ganj-e-istighna mujhe

tum karo mujh par jafaen main wafa

wo tumhein zeba hai ye zeba mujhe

bak raha hai tu main baiTha hun KHamosh

tujh ko ai naseh hai ya sauda mujhe

takHt-o-taj-o-mal-o-daulat kya karun

ya ilahi sabr de thoDa mujhe

kab shab-e-gham mein hai ummid-e-sahar

kya ho ai naseh gham-e-farda mujhe

aqraba hain sath turbat mein na dost

chal diye sab chhoD kar tanha mujhe

mah-ruKHsaron ka 'ashiq jaan kar

dagh deta hai falak kya kya mujhe

gar paDa chah-e-zanaKHdan mein 'asir'

shauq ne aisa kiya andha mujhe