دولت دنیا کی کیا پروا مجھے

دولت دنیا کی کیا پروا مجھے

حق نے بخشا گنج استغنا مجھے

تم کرو مجھ پر جفائیں میں وفا

وہ تمہیں زیبا ہے یہ زیبا مجھے

بک رہا ہے تو میں بیٹھا ہوں خموش

تجھ کو اے ناصح ہے یا سودا مجھے

تخت و تاج و مال و دولت کیا کروں

یا الٰہی صبر دے تھوڑا مجھے

کب شب غم میں ہے امید سحر

کیا ہو اے ناصح غم فردا مجھے

اقربا ہیں ساتھ تربت میں نہ دوست

چل دیے سب چھوڑ کر تنہا مجھے

ماہ رخساروں کا عاشق جان کر

داغ دیتا ہے فلک کیا کیا مجھے

گر پڑا چاہ زنخداں میں اسیرؔ

شوق نے ایسا کیا اندھا مجھے