سرائے ہستی سے اے مسافر ضرور کر قصد اب عدم کا

سرائے ہستی سے اے مسافر ضرور کر قصد اب عدم کا

کہ دن ہے نزدیک، رات ہے کم، سحر کا تارا فلک پہ چمکا

جو ہو ملاقات کی تمنا، ادھر کو تو بھی رواں ہو اے دل

سفر سے ممکن نہیں ہے پھرنا، مسافرانِ رہِ عدم کا

ہوئے تلف تخت و تاج کیا کیا، مٹے زر و مال کیسے کیسے

کہاں ہے وہ حشمتِ سکندر، نشان دیکھو کہیں ہے جم کا

بدن ہے لاغر، جگر فسردہ، دماغ ہے خشک دل ہے مردہ

الٰہی آجائے کوئی جھونکا، کسی نسیم مسیح دم کا

کسی کو باندھا، کسی کو پیسا، کسی کو مارا، کسی کو لُوٹا

بلا کے گیسو ہیں قد قیامت، غضب کی چتون، چلن ستم کا

رہِ طلب میں تمہارے طالب، ہوئے جو آوارہ ہو کے آخر

تو سیر دیکھو کہ خاک سے بھی درخت پیدا ہوا قدم کا

جہاں سے جو لوگ اٹھ گئے ہیں خبر ہو معلوم ان کی کیوں کر

کبھی نہ ہستی میں پھر کے آیا، کوئی مسافر رہِ عدم کا

جو اپنے ساتھی تھے سب سدھارے، کہاں ملے وہ کدھر کو ڈھونڈیں

جگر کو دیتا ہے داغ فرقت، جو نقش رستے میں ہے قدم کا

گزر ہوا جو میکدہ میں، ہے صید کرنے میں کیا تامل

اسیرؔ بط ہے شراب کی یہ، نہیں ہے طائر کوئی حرم کا