wo hum na the jo kisi ma’rka se Tal jate

vo ham na the jo kisī mā’rka se Tal jaate

ishāra teġh kā hotā to sar ke bal jaate

tire marīz jo vahshat kī chaal chal jaate

ḳhamīr-e-ḳhāk se mānind-e-mū nikal jaate

zaqan se ho ke rihā gesūoñ meñ dil phañstā

uchhāltā jo kuaañ azhdahe nigal jaate

hamesha ham se kajī par rahe tire abrū

ye nīmche vo na the jinke bal nikal jaate

kabhī to tum ko chhiḌaknī thī zulf par afshāñ

añdherī raat thī us meñ charāġh jal jaate

hazār tez ravī karte qāfile vaale

ham aage sūrat-e-bāñg-e-jaras nikal jaate

vo 'āshiq-e-mizha huuñ rashk se huā maiñ halāk

fusūñ-garoñ ko jo dekhā chehra nigal jaate

phañse haiñ chāh-e-zanaḳhdāñ meñ ab to vā'iz bhī

jo ham gire to gire the vahī sambhal jaate

hamārī tauba bhī tauba bhī koī ai saaqī

zarā jo dekhte badlī abhī badal jaate

dikhātā itnī to tāsīr girya-e-yā'qūb

dayār-e-misr meñ andhe kueñ ubal jaate

charāġh ḳhuub huā mere qabr par na jalā

idhar udhar ke patañge ġharīb jal jaate

bahār-e-lāla-o-gul zulf-e-sabza-o-sumbul

maza thā ham jo gulistān meñ āj-kal jaate

zamāna bhī kisī mā'shūq kā mizāj hai kyā

zarā bhī der nahīñ hai use badal jaate

junūn jo gosha-e-’uzlat meñ ye karam karatā

abhī to naam ke mānind ham nikal jaate

falak ne khāne ko itnā ġham diyā hotā

ki chaar roz merī zindagī chal jaate

'asīr' aañkh dikhātā agar hameñ sayyād

qasam tū kyā qafas-e-jism se nikal jaate

wo hum na the jo kisi ma’rka se Tal jate

ishaara tegh ka hota to sar ke bal jate

tere mariz jo wahshat ki chaal chal jate

KHamir-e-KHak se manind-e-mu nikal jate

zaqan se ho ke riha gesuon mein dil phansta

uchhaalta jo kuan azhdahe nigal jate

hamesha hum se kaji par rahe tere abru

ye nimche wo na the jinke bal nikal jate

kabhi to tum ko chhiDakni thi zulf par afshan

andheri raat thi us mein charagh jal jate

hazar tez rawi karte qafile wale

hum aage surat-e-bang-e-jaras nikal jate

wo 'ashiq-e-mizha hun rashk se hua main halak

fusun-garon ko jo dekha chehra nigal jate

phanse hain chah-e-zanaKHdan mein ab to wa'iz bhi

jo hum gire to gire the wahi sambhal jate

hamari tauba bhi tauba bhi koi ai saqi

zara jo dekhte badli abhi badal jate

dikhata itni to tasir girya-e-ya'qub

dayar-e-misr mein andhe kuen ubal jate

charagh KHub hua mere qabr par na jala

idhar udhar ke patange gharib jal jate

bahaar-e-lala-o-gul zulf-e-sabza-o-sumbul

maza tha hum jo gulistan mein aaj-kal jate

zamana bhi kisi ma'shuq ka mizaj hai kya

zara bhi der nahin hai use badal jate

junun jo gosha-e-’uzlat mein ye karam karata

abhi to nam ke manind hum nikal jate

falak ne khane ko itna gham diya hota

ki chaar roz meri zindagi chal jate

'asir' aankh dikhata agar hamein sayyaad

qasam tu kya qafas-e-jism se nikal jate