kya apni haqiqat kahun main kaun hun kya hun

kyā apnī haqīqat kahūñ maiñ kaun huuñ kyā huuñ

zāhir meñ to banda huuñ maiñ bātin meñ ḳhudā huuñ

vo jān-e-jahāñ mujh meñ hai maiñ jalva huuñ us kā

ye shaan hai ḳhud qibla-o-kHud qibla-numā huuñ

maiñ kuchh nahīñ sab kuchh huuñ na qādir huuñ na 'ājiz

hākim bhī huuñ mahkūm bhī aur sab se judā huuñ

ki husn-e-butāñ hoñge be-sabre 'āshiq

gah jāniye be-dād huuñ gah ahl-e-vafā huuñ

zebā hai na tashbīh na tanzīh mujh hī ko

āzād huuñ aur qaid-e-ta’ayyun se rihā huuñ

ne faqr kā dā'va hai na huuñ lā.iq-e-shāhī

lekin maiñ dar-e-hazrat-e-vāris kā gadā huuñ

haiñ mā'nī fī anfusikum jis pe huvaidā

'aughaT' vo samajhtā hai ki maiñ kaun huuñ kyā huuñ

kya apni haqiqat kahun main kaun hun kya hun

zahir mein to banda hun main baatin mein KHuda hun

wo jaan-e-jahan mujh mein hai main jalwa hun us ka

ye shan hai KHud qibla-o-kHud qibla-numa hun

main kuchh nahin sab kuchh hun na qadir hun na 'ajiz

hakim bhi hun mahkum bhi aur sab se juda hun

ki husn-e-butan honge be-sabre 'ashiq

gah jaaniye be-dad hun gah ahl-e-wafa hun

zeba hai na tashbih na tanzih mujh hi ko

aazad hun aur qaid-e-ta’ayyun se riha hun

ne faqr ka da'wa hai na hun laiq-e-shahi

lekin main dar-e-hazrat-e-waris ka gada hun

hain ma'ni fi anfusikum jis pe huwaida

'aughaT' wo samajhta hai ki main kaun hun kya hun