لب پہ نالہ نہ کبھی چشم میں آنسو ہوتا

لب پہ نالہ نہ کبھی چشم میں آنسو ہوتا

ایک پہلو میں یہ دل ایک میں گر تو ہوتا

پاس اس چاند سے رخسار کے رہتا ہر دم

میں سیہ بخت اگر آپ کا گیسو ہوتا

آپ کو اپنے بغل سے نہ سرکنے دیتا

ڈھونڈھتا روز ہوں ایسا کوئی پہلو ہوتا

برہمن شیح میں ہرگز نہ بکھیڑا رہتا

خوب ہوتا جو یہ قصہ کبھی یکسو ہوتا

آپ سوتے جو کسی روز مرے پہلو میں

ہاتھ تکیہ کبھی ہوتا کبھی زانو ہوتا

اس قدر آہ میں میرے جو نہ ہوتی تاثیر

نہ تو دل پر نہ انہیں پر میرا قابو ہوتا

اس طرح سے نہیں صحرا میں اکیلا پھرتا

آج کو قیس جو ہوتا مرا بازو ہوتا

یاد آتی جو چمن میں تری زلف مشکیں

مجھ کو ہر غنچہ گل نافہ آہو ہوتا

ہجر میں یار کے مے خاک ازلؔ پیتے ہم

جام گر منہ سے لگاتے بھی تو اچھو ہوتا