منہ نہ اپنا عشق سے تو اے دل بیمار کھینچ

منہ نہ اپنا عشق سے تو اے دل بیمار کھینچ

زندگی باقی ہے جب تک اور یہ آزار کھینچ

دم بہ دم نالے نہ یوں تو اے دلِ غمخوار کھینچ

کھینچتا ہے گر تو اچھا با اثر دو چار کھینچ

کس لیے آیا ہے میرے سامنے تو اے رقیب

حوصلہ گر جنگ کا کچھ دل میں ہے تلوار کھینچ

خون دل پیتے ہیں بیٹھے دور محفل سے ترے

اپنی صحبت میں ہمیں بھی ساقی غمخوار کھینچ

منہ چھپاتا ہے دوپٹہ سے ہمیں کیا دیکھ کر

گر تجھے منظور پردہ ہے تو اک دیوار کھینچ

آزمائیں آج باہم ہے کشش کس کی سوا

میں تجھے کھینچوں ادھر اور تو ادھر اے یار کھینچ

کل تو وہ اقرار تھا اور آج یہ انکار ہے

دونوں ہاتھوں سے زباں اپنی تو او مکار کھینچ

آ گئی برسات کعبہ کا تو جانا رہ گیا

اب مجھے اپنی طرف تو خانۂ خمار کھینچ

خط کسے لکھتا ہے بیٹھا اے ازلؔ بیکار بھی

اس سے بہتر ہے طرح میں یار کچھ اشعار کھینچ