بلایا غیر کو اپنا سمجھ کر

بلایا غیر کو اپنا سمجھ کر

اجی جاؤ ہم آئیں کیا سمجھ کر

کہا میں نے کہ بوسہ لوں تو بولے

اجازت دوں گا میں اچھا سمجھ کر

نہیں بے جا حسینوں کے ستم ہیں

وہ کستے ہیں ہمیں سونا سمجھ کر

میری میت پہ روے دیر تک وہ

ہنسے پہلے بہت فقرہ سمجھ کر

وہ نظروں سے گراتے ہیں گرائیں

چڑھائیں سر انہیں ہم کیا سمجھ کر

غلامی سے بتوں کی باز آئیں

کریں آزاد وہ بندہ سمجھ کر

زمانے نے کسی قابل نہ رکھا

ملیں ہم آپ سے اب کیا سمجھ کر

قیامت میں قیامت ہو نہ برپا

الٹیے گا ذرا پردہ سمجھ کر

دکھا بھی دیجیے اب جلوۂ حسن

ہمیں بھی حضرت موسیٰ سمجھ کر

میں دیوانہ ہوا ہوں اک پری کا

دوا کرتے ہیں سب سودا سمجھ کر

نہ پوچھو اے بتو در پر تمہارے

خدا جانے پڑے ہیں کیا سمجھ کر

ازلؔ ایسا نہ ہو دشمن ہنسیں سب

مرے سرکی قسم رونا سمجھ کر