عاشق سے تمہیں نفرت لا حول ولا قوت

عاشق سے تمہیں نفرت لا حول ولا قوت

اچھی نہیں یہ عادت لا حول ولا قوت

آتے وہ عیادت کو بیمار محبت کی

اتنی بھی نہیں فرصت لا حول ولا قوت

آگے مرے لے کوئی کیا نام محبت کا

غیروں کی تھی یہ طاقت لا حول ولا قوت

پہلے تری عادت سے آگاہ نہ تھے ظالم

اب تجھ سے کریں الفت لا حول ولا قوت

گہہ فکر معیشت ہے گہہ خوف ہے عقبیٰ کا

دنیا میں ملے راحت لا حول ولا قوت

کیا کہتے ہو یہ ہر دم لا کھوں مرے عاشق ہیں

دیکھوں میں ذرا صورت لا حول ولا قوت

افسوس محبت میں کچھ خاک نہ ہم سمجھے

مٹی ہوئی سب محنت لا حول ولا قوت

منعم سے جھکائیں سر عادت نہیں اپنی

کیا مال ہے یہ دولت لا حول ولاقوت

آخر کو ازلؔ اس سے ہم ہاتھ اٹھا بیٹھے

کچھ بھی نہ چلی حکمت لاحول ولا قوت