گردوں کو گرا دیں مرے نالے نہ کہیں آج

گردوں کو گرا دیں مرے نالے نہ کہیں آج

بے پردہ نہ ہو جائے کوئی پردہ نشیں آج

کیوں کر نہ ہو اس شوخ کو یکتائی کا دعویٰ

یوسف بھی تو افسوس ہے دنیا میں نہیں آج

کیا کہتا ہوں میں سنتے ہو کچھ منہ سے تو بولو

کیوں کل کی طرح یار میں رہ جاؤں یہیں آج

بوسہ پہ بگڑتے ہو تو بگڑا کرو اس دم

ہاں ہاں نہیں سننے کے تمہاری یہ نہیں آج

اس عہد کے یاروں سے خدا ہم کو بچائے

کل روتے تھے الفت کو مروت بھی نہیں آج

آتے نہیں لڑنے کو جو اغیار نہ آئیں

تلوار کو کھینچے ہوئے جاتے ہیں ہمیں آج

جو پاس رہے وصل سے محروم وہی ہو

انصاف ہمارا کرو اے یار تمہیں آج

تم دیکھنا کل پھر وہ ازلؔ شاد گرے گا

کچھ غم نہیں اس بات کا گر ہم ہیں حزیں آج