اب ملا ہے مجھے محبوب وہ نایاب حضور

اب ملا ہے مجھے محبوب وہ نایاب حضور

آپ کیا حضرت یوسف کو بھی آداب حضور

پیجیے پیجیے برسات میں توبہ کیسی

کیا گھٹا آئی ہے منگواؤں مئے ناب حضور

لائیے گور غریباں پہ نہ غیروں کو مدام

سوتے سوتے کہیں مردے نہ ہوں بد خواب حضور

یاد تو کیجیے اقرار تھے کیا کیا ہم سے

سچ ہے دنیا میں نہیں آپ سا کذ آب حضور

شب فرقت میں کہاں آپ نے رونا دیکھا

ہم نے اِن آنکھوں سے چھلکا دیے تالاب حضور

صبر ہے دل میں نہ قوت نہ شکیبائی ہے

عشق نے لوٹ لیا سب مرا اسباب حضور

قبر میں اب تو بھروسا ہے فقط آپ ہی کا

چل دیے چھوڑ کے تنہا مجھے احباب حضور

آشنا کوئی کسی کا نہیں دنیا میں ازلؔ

بس ملاقات کو اب کیجیے آداب حضور