دیر میں کعبہ میں یا جا کے کلیسا دیکھیں

دیر میں کعبہ میں یا جا کے کلیسا دیکھیں

سخت حیراں ہیں کہاں پر ترے جو یا دیکھیں

روز کہتا ہے جنوں سر بہ گریباں کیا ہو

آؤ بھی چل کے ذرا دامن صحرا دیکھیں

دل جو ہے خانہ اللہ وہ کرتا ہے خراب

عشق کی آپ ذرا حرکتِ بے جا دیکھیں

تم تو جانبازی عشاق بہت دیکھ چکے

ہم بھی اب آپ کا اعجاز مسیحا دیکھیں

آج ہم مرکے ترے عشق سے باز آتے ہیں

اور پھر کس کے بندھے سر پہ یہ سہرا دیکھیں

نام میرا ہی نکل آئے گا عشاقوں میں

اپنی زلفوں کا اگر آپ سیاہا دیکھیں

پتلیاں یہ ہیں کہ ہے عکس کسی کے قد کا

کیا چھپائے ہے میری آنکھ کا پردا دیکھیں

لے کے دل جاتے ہیں بازار حسیناں میں عزیزؔ

آج بک جائے کہ رہ جائے یہ سودا دیکھیں