kudurat hai to sulh-o-ashti se kuchh nahin hota

kudūrat hai to sulh-o-āshtī se kuchh nahīñ hotā

aqīdat uTh ga.ī to bandagī se kuchh nahīñ hotā

dil nākām agar himmat-varī se kuchh nahīñ hotā

to phir din raat kī nauhagarī se kuchh nahii. hotā

dil-ārā.ī nahīñ hai dil-dahī se kuchh nahīñ hotā

vafā.eñ ro rahī haiñ aadmī se kuchh nahīñ hotā

jahāñ vāloñ ke kuchh nāz-o-sitam bhī sahne paḌte haiñ

ye duniyā hai yahāñ apnī ḳhushī se kuchh nahii. hotā

jahāñ par faiz hāsil ho paḌā rah bas usī dar par

dil-e-vahshat-zada āvārgī se kuchh nahii. hotā

ilāj-e-kulfat-e-duniya madāvā-e-ġham-e-daurāñ

ḳhudā kar de to kar de aadmī se kuchh nahīñ hotā

na ho ġhamgīñ-asar ahl-e-jahāñ kī bevafā.ī par

masarrat se basar kar le ġhamī se kuchh nahīñ hotā

kudurat hai to sulh-o-ashti se kuchh nahin hota

aqidat uTh gai to bandagi se kuchh nahin hota

dil nakaam agar himmat-wari se kuchh nahin hota

to phir din raat ki nauhagari se kuchh nahi hota

dil-arai nahin hai dil-dahi se kuchh nahin hota

wafaen ro rahi hain aadmi se kuchh nahin hota

jahan walon ke kuchh naz-o-sitam bhi sahne paDte hain

ye duniya hai yahan apni KHushi se kuchh nahi hota

jahan par faiz hasil ho paDa rah bas usi dar par

dil-e-wahshat-zada aawargi se kuchh nahi hota

ilaj-e-kulfat-e-duniya madawa-e-gham-e-dauran

KHuda kar de to kar de aadmi se kuchh nahin hota

na ho ghamgin-asar ahl-e-jahan ki bewafai par

masarrat se basar kar le ghami se kuchh nahin hota