کدورت ہے تو صلح و آشتی سے کچھ نہیں ہوتا

کدورت ہے تو صلح و آشتی سے کچھ نہیں ہوتا

عقیدت اٹھ گئی تو بندگی سے کچھ نہیں ہوتا

دل ناکام اگر ہمت وری سے کچھ نہیں ہوتا

تو پھر دن رات کی نوحہ گری سے کچھ نہیں ہوتا

دل آرائی نہیں ہے دل دہی سے کچھ نہیں ہوتا

وفائیں رو رہی ہیں آدمی سے کچھ نہیں ہوتا

جہاں والوں کے کچھ ناز و ستم بھی سہنے پڑتے ہیں

یہ دنیا ہے یہاں اپنی خوشی سے کچھ نہیں ہوتا

جہاں پر فیض حاصل ہو پڑا رہ بس اسی در پر

دل وحشت زدہ آوارگی سے کچھ نہیں ہوتا

علاج کلفت دنیا مداوائے غم دوراں

خدا کر دے تو کر دے آدمی سے کچھ نہیں ہوتا

نہ ہو غمگیں اثرؔ اہل جہاں کی بے وفائی پر

مسرت سے بسر کر لے غمی سے کچھ نہیں ہوتا