gham-e-ulfat ko bhi mahbub-e-jaan kahna hi paDta hai

ġham-e-ulfat ko bhī mahbūb-e-jāñ kahnā hī paḌtā hai

bisāt-e-dāġh dil ko gulistāñ kahnā hī paḌtā hai

kisī be-mehr ko jab mehrbāñ kahnā hī paḌtā hai

to dil kā qatl hai aur al-amāñ kahnā hī paḌtā hai

nigāh-e-yār tuune raaz dil ke kah diye kyā kyā

tirī chashmak ko andāz-e-bayāñ kahnā hī paḌtā hai

savāl-e-dost par andesha-e-tarke-mohabbat se

nahīñ kahne kī hālat meñ bhī haañ kahnā hai paḌtā hai

mirī taqdīr tujh par munhasir Thahrī to phir tujh ko

ḳhudā ik aur zer-e-āsmāñ kahnā hī paḌtā hai

mohabbat maujzan hai aur umañgoñ meñ talātum hai

hamāre dil ko bahr-e-be-karāñ kahnā hī paḌtā hai

dayār-e-yār tak terī rasā.ī hai jo nā-mumkin

use dil terī marg-e-nā-gahāñ kahnā hī paḌtā hai

'asar' is arsa-gāh-e-ishq meñ dekhe tire jauhar

za.īfī meñ tujhe āḳhir javāñ kahnā hī paḌtā hai

gham-e-ulfat ko bhi mahbub-e-jaan kahna hi paDta hai

bisat-e-dagh dil ko gulistan kahna hi paDta hai

kisi be-mehr ko jab mehrban kahna hi paDta hai

to dil ka qatl hai aur al-aman kahna hi paDta hai

nigah-e-yar tune raaz dil ke kah diye kya kya

teri chashmak ko andaz-e-bayan kahna hi paDta hai

sawal-e-dost par andesha-e-tarke-mohabbat se

nahin kahne ki haalat mein bhi han kahna hai paDta hai

meri taqdir tujh par munhasir Thahri to phir tujh ko

KHuda ek aur zer-e-asman kahna hi paDta hai

mohabbat maujzan hai aur umangon mein talatum hai

hamare dil ko bahr-e-be-karan kahna hi paDta hai

dayar-e-yar tak teri rasai hai jo na-mumkin

use dil teri marg-e-na-gahan kahna hi paDta hai

'asar' is arsa-gah-e-ishq mein dekhe tere jauhar

zaifi mein tujhe aaKHir jawan kahna hi paDta hai