غم الفت کو بھی محبوب جاں کہنا ہی پڑتا ہے

غم الفت کو بھی محبوب جاں کہنا ہی پڑتا ہے

بساط داغ دل کو گلستاں کہنا ہی پڑتا ہے

کسی بے مہر کو جب مہرباں کہنا ہی پڑتا ہے

تو دل کا قتل ہے اور الاماں کہنا ہی پڑتا ہے

نگاہ یار تونے راز دل کے کہہ دئے کیا کیا

تری چشمک کو انداز بیاں کہنا ہی پڑتا ہے

سوال دوست پر اندیشۂ ترک محبت سے

نہیں کہنے کی حالت میں بھی ہاں کہنا ہے پڑتا ہے

مری تقدیر تجھ پر منحصر ٹھہری تو پھر تجھ کو

خدا اک اور زیر آسماں کہنا ہی پڑتا ہے

محبت موجزن ہے اور امنگوں میں تلاطم ہے

ہمارے دل کو بحر بیکراں کہنا ہی پڑتا ہے

دیار یار تک تیری رسائی ہے جو نا ممکن

اسے دل تیری مرگ ناگہاں کہنا ہی پڑتا ہے

اثرؔ اس عرصہ گاہ عشق میں دیکھے ترے جوہر

ضعیفی میں تجھے آخر جواں کہنا ہی پڑتا ہے