یا رب کہیں وہ تن سے مرا سر جدا کرے

یا رب کہیں وہ تن سے مرا سر جدا کرے

کب تک یہ بار دوش پہ میرے رہا کرے

چاہے جفا کرے وہ حسیں یا وفا کرے

اب تو دیا دل اس کو جو چاہے خدا کرے

کب تک کوئی فراق کے صدمے سہا کرے

گھبرا کے مرنہ جائے جو انساں تو کیا کرے

موجود ہیں ہدف کو دل و دیدہ و جگر

تیز نگاہ یار جہاں چاہے جا کرے

وہ شمع رو بھی بزم میں ہے اور شمع بھی

پروانہ دیکھیں جان کو کس پر فدا کرے

ہر سبزے کی زباں سے سنے حمد کبریا

غافل چمن میں گوشِ نصیحت جو وا کرے

آب بقا ہوا نہ سکندر کو دستیاب

تقدیر ہی رسا نہیں تدبیر کیا کرے

رخصت گلوں سے ہوتے کہ جاتی ہے فصلِ گل

صیادِ بے وفا جو قفس سے رہا کرے

اس وقت اپنے چاہنے والوں کی قدر ہو

تم کو بھی جب کسی کا خدا مبتلا کرے

بندے کو عذر کیا ہے جو مالک کی ہو رضا

راضی ہیں ہم اسی میں جو چاہے خدا کرے

حیرتؔ خدا گواہ ہے اف بھی جو لب تک آئے

جو ظلم چاہے وہ بتِ نا آشنا کرے