جب وہ ستم شعار جفا پر جفا کرے

جب وہ ستم شعار جفا پر جفا کرے

بے صبر دل کسی کا نہ تڑپے تو کیا کرے

پتھر نہیں ہے دل ہے کہاں تک اٹھائے چوٹ

جور و ستم حضور کے کب تک سہا کرے

ہلکے قدم تو آپ رقیبوں کے گھر میں جائیں

نقش قدم کی طرح کوئی کیوں مٹا کرے

یا رب خرامِ ناز سے پس جائے دل اگر

سرمہ کی طرح چشم بتاں میں رہا کرے

مقتل میں آج جاتا ہوں تیغ و کفن کے ساتھ

اب دیکھیے کہ عذر وہ عیار کیا کرے

دو چار بوتلوں سے نہ بجھے گی مری پیاس

خم بھر دے ساقیا ترا داتا بھلا کرے

ٹھنڈا وضو ہو شیخ کا جام شراب سے

اک گھونٹ بھی جو پائے تو روزے قضا کرے

رسوائی بھی رقیب کا کھٹکا بھی رشک بھی

بزمِ طرب میں ان کے کوئی جا کے کیا کرے

اس بت کے انتظار میں آنکھوں میں دم ہے بدرؔ

رستہ ہی بھول کر ادھر آئے خدا کرے