mere pahlu mein ye ghaarat-gar-e-jaan kaun aaya

mere pahlū meñ ye ġhārat-gar-e-jāñ kaun aayā

paikar-e-nāz-o-adā amn-o-amāñ kaun aayā

jis kī āñkheñ nahīñ do jaam haiñ saaqī kī qasam

apnī nazroñ meñ liye ritl-e-garāñ kaun aayā

jis kī bebāk nigāhī meñ hijāboñ kā hujūm

'ishq hai aaj ba-hairat-e-nigarāñ kaun aayā

sub.h ke rañg pe chhā.ī hai latāfat shab kī

zulf-e-mushkīñ ko ba-ruḳh-e-raqs-e-kunāñ kaun aayā

be-sune kaun banā 'ain tamannā-e-dilī

be-kahe hāsil-e-alfāz-o-bayāñ kaun aayā

maiñ bhī hairat meñ huuñ hairat meñ hai duniyā bhī mirī

aaj sun kar dil-e-muztar ko fuġhāñ kaun aayā

chashm mushtāq hai dil mast hai betāb se ruuh

yā ḳhudā ban ke murād-e-dil-o-jāñ kaun aayā

be-ḳhud-e-shauq huuñ 'bahzād' mujhe hosh hai kyā

jazb dil se mire be-tāb-o-tavāñ kaun aayā

mere pahlu mein ye ghaarat-gar-e-jaan kaun aaya

paikar-e-naz-o-ada amn-o-aman kaun aaya

jis ki aankhen nahin do jam hain saqi ki qasam

apni nazron mein liye ritl-e-garan kaun aaya

jis ki bebak nigahi mein hijabon ka hujum

'ishq hai aaj ba-hairat-e-nigaran kaun aaya

subh ke rang pe chhai hai latafat shab ki

zulf-e-mushkin ko ba-ruKH-e-raqs-e-kunan kaun aaya

be-sune kaun bana 'ain tamanna-e-dili

be-kahe hasil-e-alfaz-o-bayan kaun aaya

main bhi hairat mein hun hairat mein hai duniya bhi meri

aaj sun kar dil-e-muztar ko fughan kaun aaya

chashm mushtaq hai dil mast hai betab se ruh

ya KHuda ban ke murad-e-dil-o-jaan kaun aaya

be-KHud-e-shauq hun 'bahzad' mujhe hosh hai kya

jazb dil se mere be-tab-o-tawan kaun aaya