میرے پہلو میں یہ غارت گر جاں کون آیا

میرے پہلو میں یہ غارت گر جاں کون آیا

پیکر ناز و ادا امن و اماں کون آیا

جس کی آنکھیں نہیں دو جام ہیں ساقی کی قسم

اپنی نظروں میں لیے رطل گراں کون آیا

جس کی بے باک نگاہی میں حجابوں کا ہجوم

عشق ہے آج بہ حیرت نگراں کون آیا

صبح کے رنگ پہ چھائی ہے لطافت شب کی

زلف مشکیں کو بہ رخ رقص کناں کون آیا

بے سنے کون بنا عین تمنائے دلی

بے کہے حاصل الفاظ و بیاں کون آیا

میں بھی حیرت میں ہوں حیرت میں ہے دنیا بھی مری

آج سن کر دل مضطر کو فغاں کون آیا

چشم مشتاق ہے دل مست ہے بیتاب سے روح

یا خدا بن کے مراد دل و جاں کون آیا

بے خود شوق ہوں بہزادؔ مجھے ہوش ہے کیا

جذب دل سے مرے بے تاب و تواں کون آیا