میرے پہلو میں یہ غارت گرِ جاں کون آیا

میرے پہلو میں یہ غارت گرِ جاں کون آیا

پیکرِ ناز و ادا امن و اماں کون آیا

جس کی آنکھیں نہیں دو جام ہیں ساقی کی قسم

اپنی نظروں میں لیے رطلِ گراں کون آیا

جس کی بیباک نگاہی میں حجابوں کا ہجوم

عشق ہے آج بحیرت نگراں کون آیا

صبح کے رنگ پہ چھائی ہے لطافت شب کی

زلفِ مشکیں کو بہ رخ رقص کنان کون آیا

بے سنے کون بنا عین تمنائے دلی

بے کہے حاصل الفاظ و بیان کون آیا

میں بھی حیرت میں ہوں حیرت میں ہے دنیا بھی مری

آج سن کر دلِ مضطر کو فغاں کون آیا

چشم مشتاق ہے دل مست ہے بیتاب سے روح

یا خدا بن کے مراد دل و جاں کون آیا

بیخود شوق ہوں بہزادؔ مجھے ہوش ہے کیا

جذب دل سے مرے بیتاب و تواں کون آیا