بہت غم نہاں ہیں میری زندگی میں

بہت غم نہاں ہیں میری زندگی میں

بڑی تلخیاں ہیں میری زندگی میں

کہیں تم کو ملتیں تو تم دم نہ لیتے

جو محرومیاں میں میری زندگی میں

انھیں کے تصور میں رہتا ہوں ہر دم

وہ ہر سو عیاں ہیں میری زندگی میں

جو تم بھی مٹاؤ تو مٹنا ہیں مشکل

وہ مجبوریاں ہیں میری زندگی میں

کبھی یاس رہنا کبھی آس رہنا

نئے دو جہاں ہیں میری زندگی میں

الٰہی مجھے یہ گوارا نہیں ہے

سنا وہ بتاں ہیں میری زندگی میں

نہیں جن کی تعبیر بہزادؔ ممکن

وہ خواب گراں ہیں میری زندگی میں