ترے ذکر نے ترے فکر نے تری یاد نے وہ مزا دیا

ترے ذکر نے ترے فکر نے تری یاد نے وہ مزا دیا

کہ جہاں ملا کوئی نقش پا وہیں ہم نے سر کو جھکا دیا

ترے دست بندہ نواز نے میری آرزو سے سوا دیا

مگر آہ جذبِ جہاں طلب میں یہ کہہ رہا ہوں کہ کیا دیا

وہ جو رہروی کا مآل ہے وہی میری منزلِ حال ہے

مجھے رہبروں سے ملا ہی کیا مجھے رہزنوں نے پتا دیا

نہ جنوں نہ جوشِ جنوں رہا، نہ تو دل نہ سوزِ دروں رہا

تری اک نگاہِ سلوک نے غم زندگی کو بھلا دیا

تیرے میکدے میں جو آگیا وہ متاعِ ہوش اڑا گیا

اسے کھو دیا، تجھے پا گیا، جہاں جام تو نے پلا دیا

کبھی مجھ سےآنکھ ملا گئے، کبھی مجھ سے آنکھ چرا گئے

کبھی اک نظر میں بنا دیا، کبھی اک نظر میں مٹا دیا