meri jo har taraf ko nazar dekhti rahi

merī jo har taraf ko nazar dekhtī rahī

duniyā mazāq-e-sho'bada gar dekhtī rahī

ik sham'-e-dil-gudāz az farozāñ baġhair-e-nūr

merī shab-e-alam ko sahr dekhtī rahī

gum-gashtagī meñ bhī sar-e-manzil pahuñch gayā

muḌ-muḌ ke mujh ko rāh-guzar dekhtī rahī

sāġhar kā kis ko hosh thā mai kā kise dimāġh

saaqī ko mai-kashoñ kī nazar dekhtī rahī

vaqt-e-vidā.a dost merī chashm-e-nā-murād

dekhā na jā rahā thā magar dekhtī rahī

us dar pe le ga.ī tire sajdoñ kī aarzū

jis dar pe sar ko sab kī nazar dekhtī rahī

vīrāniyāñ nisār thiiñ be-rabtiyāñ fidā

'bahzād' bebasī merā ghar dekhtī rahī

meri jo har taraf ko nazar dekhti rahi

duniya mazaq-e-sho'bada gar dekhti rahi

ek sham'-e-dil-gudaz az farozan baghair-e-nur

meri shab-e-alam ko sahr dekhti rahi

gum-gashtagi mein bhi sar-e-manzil pahunch gaya

muD-muD ke mujh ko rah-guzar dekhti rahi

saghar ka kis ko hosh tha mai ka kise dimagh

saqi ko mai-kashon ki nazar dekhti rahi

waqt-e-widaa dost meri chashm-e-na-murad

dekha na ja raha tha magar dekhti rahi

us dar pe le gai tere sajdon ki aarzu

jis dar pe sar ko sab ki nazar dekhti rahi

viraniyan nisar thin be-rabtiyan fida

'bahzad' bebasi mera ghar dekhti rahi