میری جو ہر طرف کو نظر دیکھتی رہی

میری جو ہر طرف کو نظر دیکھتی رہی

دنیا مذاق شعبدہ گر دیکھتی رہی

اک شمع دل گداز از فروزاں بغیر نور

میری شب الم کو سحر دیکھتی رہی

گم گشتگی میں بھی سر منزل پہنچ گیا

مڑ مڑ کے مجھ کو راہگزر دیکھتی رہی

ساغر کا کس کو ہوش تھا مے کا کسے دماغ

ساقی کو میکشوں کی نظر دیکھتی رہی

وقت وداع دوست میری چشم نا مراد

دیکھا نہ جا رہا تھا مگر دیکھتی رہی

اس در پہ لے گئی ترے سجدوں کی آرزو

جس در پہ سر کو سب کی نظر دیکھتی رہی

ویرانیاں نثار تھیں بے ربطیاں فدا

بہزادؔ بے بسی میرا گھر دیکھتی رہی