میری جو ہر طرف کو نظر دیکھتی رہی

میری جو ہر طرف کو نظر دیکھتی رہی

دنیا مذاق شعبدہ گر دیکھتی رہی

اک شمع دلگداز از فروزاں بغیر نور

میری شب الم کو سحر دیکھتی رہی

گم گشتگی میں بھی سرِ منزل پہنچ گیا

مڑ مڑ کے مجھ کو راہ گذر دیکھتی رہی

ساغر کا کس کو ہوش تھا مئے کا کسی دماغ

ساقی کو میکشوں کی نظر دیکھتی رہی

وقت وداع دوست میری چشمِ نا مراد

دیکھا نہ جا رہا تھا مگر دیکھتی رہی

اس در پہ لے گئی ترے سجدوں کی آرزو

جس در پر سر کو سب کی نظر دیکھتی رہی

ویرانیاں نثار تھیں بے ربطیاں فدا

بہزادؔ بے بسی میرا گھر دیکھتی رہی