tere gham se mil raha hai mujhe har tarah sahaara

tire ġham se mil rahā hai mujhe har tarah sahārā

yahī dard-e-zindagī hai yahī mauj hai kinārā

tujhe kis tarah se pā.ūñ baḌī duur hai kinārā

mirī zindagī ik aañsū tirī zindagī sitārā

mire 'ishq kā safīna hai 'ajīb kashmakash meñ

kabhī chhuT gayā kinārā kabhī mil gayā kinārā

mujhe vo jagah batā do jahāñ sar jhukā sakūñ maiñ

mujhe vo nazar batā do jo samajh sake ishārā

tirī aarzū ne khoyā mujhe kar ke terā juuyā

tirī yaad ne Duboyā tire ġham ne paar utārā

abhī tak vahī tapish hai abhī tak vahī ḳhalish hai

abhī tak sulag rahā hai vahī 'ishq kā sharāra

tirā zikr merā īmāñ tirī fikr diin merā

tirī yaad merā 'ālam tirā ġham mirā sahārā

tere gham se mil raha hai mujhe har tarah sahaara

yahi dard-e-zindagi hai yahi mauj hai kinara

tujhe kis tarah se paun baDi dur hai kinara

meri zindagi ek aansu teri zindagi sitara

mere 'ishq ka safina hai 'ajib kashmakash mein

kabhi chhuT gaya kinara kabhi mil gaya kinara

mujhe wo jagah bata do jahan sar jhuka sakun main

mujhe wo nazar bata do jo samajh sake ishaara

teri aarzu ne khoya mujhe kar ke tera juya

teri yaad ne Duboya tere gham ne par utara

abhi tak wahi tapish hai abhi tak wahi KHalish hai

abhi tak sulag raha hai wahi 'ishq ka sharara

tera zikr mera iman teri fikr din mera

teri yaad mera 'alam tera gham mera sahaara