phaDakne de raha hai gar phaDakta hai machalta hai

phaḌakne de rahā hai gar phaḌaktā hai machaltā hai

samajh rakhā hai zālim ne phañsā dil kab nikaltā hai

mire qalb par armāñ kā 'ajab 'ālam hai ai hamdam

na Thahrā.e Thahartā hai na bahlā.e bahaltā hai

hameñ kyā hai ki ham to rañg-e-'ālam se guzar aa.e

sunā hai āj-kal pahroñ koī hāthoñ ko maltā hai

tirī barq-e-tajallī kī karam-bārī nahīñ jaatī

ki ab bhī hosh uḌte haiñ ki ab bhī tuur jaltā hai

maiñ pahroñ dekhtā huuñ un ko aur us qalb-e-muztar ko

vo jab uThte haiñ ye kambaḳht bhī karvaT badaltā hai

kisī 'ālam kisī 'unvāñ nahīñ taskīn-e-dil hotī

kisī sūrat kisī andāz kab ye dil bahaltā hai

sunā 'bahzād' ab suunī paḌī hai bazm-e-jānāñ bhī

na ab sham.eñ hī jaltī haiñ na ab parvāna jaltā hai

phaDakne de raha hai gar phaDakta hai machalta hai

samajh rakha hai zalim ne phansa dil kab nikalta hai

mere qalb par arman ka 'ajab 'alam hai ai hamdam

na Thahrae Thaharta hai na bahlae bahalta hai

hamein kya hai ki hum to rang-e-'alam se guzar aae

suna hai aaj-kal pahron koi hathon ko malta hai

teri barq-e-tajalli ki karam-bari nahin jati

ki ab bhi hosh uDte hain ki ab bhi tur jalta hai

main pahron dekhta hun un ko aur us qalb-e-muztar ko

wo jab uThte hain ye kambaKHt bhi karwaT badalta hai

kisi 'alam kisi 'unwan nahin taskin-e-dil hoti

kisi surat kisi andaz kab ye dil bahalta hai

suna 'bahzad' ab suni paDi hai bazm-e-jaanan bhi

na ab shamen hi jalti hain na ab parwana jalta hai