پھڑکنے دے رہا ہے گر پھڑکتا ہے مچلتا ہے

پھڑکنے دے رہا ہے گر پھڑکتا ہے مچلتا ہے

سمجھ رکھا ہے ظالم نے پھنسا دل کب نکلتا ہے

مرے قلب پر ارماں کا عجب عالم ہے اے ہمدم

نہ ٹھہرائے ٹھہرتا ہے نہ بہلائے بہلتا ہے

ہمیں کیا ہے کہ ہم تو رنگ عالم سے گذر آئے

سنا ہے آج کل پھروں کوئی ہاتھوں کو ملتا ہے

تری برق تجلی کی کرم باری نہیں جاتی

کہ اب بھی ہوش اڑتے ہیں کہ اب بھی طور جلتا ہے

میں پھروں دیکھتا ہوں ان کو اور اس قلب مضطر کو

وہ جب اٹھتے ہیں یہ کمبخت بھی کروٹ بدلتا ہے

کسی عالم کسی عنواں نہیں تسکینِ دل ہوتی

کسی صورت کسی انداز کب یہ دل بہلتا ہے

سنا بہزادؔ اب سونی پڑی ہے بزمِ جاناں بھی

نہ اب شمعیں ہی جلتی ہیں نہ اب پروانہ جلتا ہے