میری زباں خموش ہے نغمۂ غم سنائے کون

میری زباں خموش ہے نغمۂ غم سنائے کون

سارا جہاں ہے منتظر وجد میں اس کو لائے کون

جس کو مرا خیال ہو دیکھ لے شمعِ بزم کو

کہنے سے فائدہ ہی کیا رازِ دلی بتائے کون

اب وہ کہاں ہے ناز حسن اب ہے کہاں نیاز عشق

کون بہائے اشک غم دیکھ کے مسکرائے کون

عشق کو آزما چکے صاحب عقل و ہوش و دل

حسن عجیب چیز ہے حسن کو آزمائے کون

سن کے میری تباہیاں پرشسِ حال کس نے کی

کس نے بھری اک آہ غم کس نے کہا کہ ہائے کون

دور نیاز و ناز ہے عالم سوز و ساز ہے

جلوہ تو خود ہی آئے گا اپنی نظر اٹھائے کون

کون مراد مند ہے، آج ہوا بھی بند ہے

کون چلے چمن چمن غنچہ بغنچہ جائے کون