لو مبارک وقت شام آنے لگا

لو مبارک وقت شام آنے لگا

دل کو کیف نا تمام آنے لگا

توبہ جب سے میں نے کر لی مے کشو

خود میری جانب کو جام آنے لگا

ان کے لب پر یہ حقیقت ہے کہ خواب

میرا قصہ میرا نام آنے لگا

آنکھوں آنکھوں میں ہوئی کل داستاں

نظروں نظروں میں پیام آنے لگا

پھر اٹھا ابر سیہ مستانہ وار

پھر کوئی بادہ بہ جام آنے لگا

کس سے امید وفا رکھوں بھلا

بے بسی میں کون کام آنے لگا

اب چلو بہزادؔ پھر سوئے وطن

خط میں لکھ لکھ کر سلام آنے لگا