دیر بہ دیر کو بکو سجدہ کناں گذر گیا

دیر بہ دیر کو بکو سجدہ کناں گذر گیا

عشق بصد نیازِ شوق پا کے اماں گذر گیا

جنبشِ چشم ناز دوست کر گئی طرفہ انقلاب

فصل بہار آگئی دورِ خزاں گذر گیا

جام رہا یونہی دھرا ہوش ہی مجھ کو کب رہا

ہو کے جو میرے پاس سے پیر مغاں گذر گیا

منزل سوز و ساز سے حد وفا طراز سے

رہن یقیں نہ جا سکا وقفِ گماں گذر گیا

اپنے جہانِ ناز میں تو اسے گرم شوق رکھ

پھر اسے کون پائے گا عشقِ جہاں گذر گیا

اب ہے کہاں وہ بے حجاب چہرے پہ آ چکی نقاب

کون پڑھے نمازِ عشق وقت اذاں گذر گیا

ڈال کے مجھ پہ اک نگاہ دیکھ کے عشق میں تباہ

اس کے نثار جائیے نغمہ کناں گذر گیا