دیر بہ دیر کو بکو سجدہ کناں گزر گیا

دیر بہ دیر کو بکو سجدہ کناں گزر گیا

عشق بصد نیاز شوق پا کے اماں گزر گیا

جنبش چشم ناز دوست کر گئی طرفہ انقلاب

فصل بہار آ گئی دور خزاں گزر گیا

جام رہا یونہی دھرا ہوش ہی مجھ کو کب رہا

ہو کے جو میرے پاس سے پیر مغاں گزر گیا

منزل سوز و ساز سے حد وفا طراز سے

رہن یقیں نہ جا سکا وقف گماں گزر گیا

اپنے جہان ناز میں تو اسے گرم شوق رکھ

پھر اسے کون پائے گا عشق جہاں گزر گیا

اب ہے کہاں وہ بے حجاب چہرے پہ آ چکی نقاب

کون پڑھے نماز عشق وقت اذاں گزر گیا

ڈال کے مجھ پہ اک نگاہ دیکھ کے عشق میں تباہ

اس کے نثار جائیے نغمہ کناں گزر گیا